Arion banki eignast tryggingafélagið Vörð

Arion banki hefur eignast 100% hlutafjár í tryggingarfélaginu Verði. Í október á síðasta ári sömdu Arion banki og BankNordik um kaup Arion banka á tryggingafélaginu af BankNordik. Samningurinn var skilyrtur og meðal annars háður samþykki opinberra aðila. Öll skilyrði samingsins hafa verið uppfyllt.

Kjörin hefur verið ný stjórn Varðar. Í henni sitja Helgi Bjarnason, formaður, Ásta Guðjónsdóttir, Guðný Benediktsdóttir, Marinó Örn Tryggvason og Þorvarður Sæmundsson.

Höskuldur H. Ólafsson, bankastjóri Arion banka:

„Það er ánægjulegt að kaupin hafi nú gengið í gegn en það tók lengri tíma en við væntum að uppfylla öll skilyrði samninganna. Það er mikilvægur þáttur í okkar stefnu að bjóða viðskiptavinum okkar alhliða fjármálaþjónustu og með kaupunum á Verði þá bætast skaðatryggingar við okkar fjölbreytta vöru- og þjónustuframboð, en líftryggingar hafa lengi verið hluti af okkar þjónustu í gegnum Okkar líftryggingar. Vörður er öflugt fyrirtæki með sterkt vörumerki á íslenskum tryggingamarkaði og við hlökkum til frekari uppbyggingar félagsins.“