238 umsóknir bárust í Startup Reykjavik

Umsóknarfresti í Startup Reykjavik lauk þann 8. apríl sl. Að þessu sinni bárust 238 umsóknir sem er 70% fleiri en árið 2017. Tíu fyrirtæki verða valin til þátttöku en miðað er við að þau hafi verið valin ekki seinna en fyrstu vikuna í maí. Að þessu sinni verða því einungis 4% þeirra fyrirtækja sem sóttu um valin til þátttöku. Erlendar umsóknir hafa aldrei verið fleiri en en nú og er hlutfall innlendra og erlendra umsókna nú í fyrsta sinn nokkurn veginn jafnt.

Startup Reykjavik hefur fest sig í sessi sem einn besti vettvangurinn fyrir frumkvöðlafyrirtæki að móta sínar viðskiptahugmyndir betur á Íslandi. Frá upphafi hafa 60 fyrirtæki farið í gegnum viðskiptahraðalinn. Arion banki, í gegnum dótturfélagið Startup Reykjavik Invest ehf., fjárfestir 2,4 milljónum króna í hverju fyrirtæki gegn 6% eignarhlut. Startup Reykjavik fyrirtæki hafa í heildina fengið fjármögnun sem nemur um 2,8 milljörðum króna og er um 70% þess fjármagns hlutafé frá fjárfestum en um 30% styrkir.

Einar Gunnar Guðmundsson, forsvarsmaður nýsköpunar hjá Arion banka:

„Áfram sýnir það sig hversu mikilvægt Startup Reykjavik er í frumkvöðla- og nýsköpunarumhverfinu. Úr hraðlinum hafa í gegnum tíðina komið einkar áhugaverð fyrirtæki sem hafa notið þess stuðnings sem þar er í boði. Við hlökkum til að vinna með þeim fyrirtækjum í sumar sem valin verða til þátttöku að þessu sinni.“

Edda Konráðsdóttir, verkefnastjóri Startup Reykjavik hjá Icelandic Startups:

„Það er einkar ánægjulegt að sjá áframhaldandi mikinn áhuga á Startup Reykjavik, bæði innanlands og utan. Það eykur trúverðugleika verkefnisins að erlendir frumkvöðlar sjá sér hag í því að sækja um þátttöku hér á landi. Gróskan í frumkvöðlaumhverfinu er mikil og spennandi verður að sjá hvernig fyrirtæki hafa sótt um í ár.“

Viðskiptahraðallinn Startup Reykjavik var stofnaður árið 2012 í samstarfi Arion banka og Icelandic Startups. Arion banki er eigandi Startup Reykjavik og fjármagnar verkefnið að fullu. Startup Reykjavik var valinn besti viðskiptahraðallinn á Norðurlöndunum árið 2015.

Fjöldi umsókna í Startup Reykjavik 2012-2018

Fjármögnun* Startup Reykjavik fyrirtækja eftir árgöngum í milljónum króna
 

*Fjármögnun miðast við þátttökuár fyrirtækjanna en ekki hvenær fjárfestingin sjálf var gerð.
Þannig er rökrétt að fjármögnun eldri árganga sé meiri en yngri árganga.