Arion banki hluti af nýrri Ólympíufjölskyldu ÍSÍ

Arion banki er nýr bakhjarl Íþrótta- og ólympíusambands Íslands og þar með hluti af Ólympíufjölskyldu ÍSÍ.

Samstarfssamningur þess efnis var undirritaður mánudaginn 22. maí af þeim Höskuldi H. Ólafssyni, bankastjóra Arion banka, Lárusi L. Blöndal, forseta ÍSÍ, og Líneyju Rut Halldórsdóttur, framkvæmdastjóra ÍSÍ. Á sama tíma voru undirritaðir samstarfssamningar ÍSÍ og annarra styrktaraðila en auk Arion banka eru það Icelandair, Sjóvá, Toyota og Valitor sem skipa Ólympíufjölskyldu ÍSÍ 2017-2020.

Til margra ára hefur Ólympíufjölskyldan stutt dyggilega við bakið á ÍSÍ og íslenskri íþróttahreyfingu, með það að markmiði að efla íslenskt íþróttalíf og þátttöku Íslands á erlendum vettvangi. Verkefni ÍSÍ eru fjölmörg en þar má m.a. nefna þátttöku 136 íslenskra keppenda á smáþjóðaleikunum í San Marínó sem hófust í dag og standa til 3. júní.