Skissum saman á laugardaginn

Nú styttist í að HönnunarMars hefjist en formleg dagskrá hefst næstkomandi fimmtudag 10. mars og stendur til sunnudagsins 13. mars.

Laugardaginn 12. mars milli klukkan 13.00-16.00 verðum við með skemmtilegan viðburð í Borgartúni 19 sem nefnist Skissum saman. Þar gefst gestum og gangandi, tækifæri til að mæta í hús og skissa saman undir styrkri stjórn snjallra hönnuða. Öll áhöld verða á staðnum og boðið verður upp á léttar veitingar.

Skissum saman er haldið í tengslum við opnun nýrrar sýningar í höfuðstöðvunum þar sem skissur og vinnuaðferðir ólíkra hönnuða og arkitekta verða til sýnis.

Við hjá Arion banka leggjum ríka áherslu að styðja við og stuðla að hvers kyns nýsköpun. Liður í þeirri vegferð er nýundirritaður þriggja ára samningur bankans við Hönnunarmiðstöð Íslands. Samstarfið felur meðal annars í sér stuðning Arion banka við HönnunarMars, sem er einn aðalvettvangur Hönnunarmiðstöðvar til að koma íslenskri hönnun og hugviti á framfæri.