Vegna ákvörðunar Fjármálaeftirlitsins

Fjármálaeftirlitið birti í dag gagnsæistilkynningu, þar sem fram kemur að eftirlitið hafi lagt stjórnvaldssekt, 30 milljónir kr., á Arion banka fyrir brot gegn 1. tölulið 1. mgr. 123. gr. laga nr. 108/2007 um verðbréfaviðskipti.

Arion banki vill af því tilefni koma eftirfarandi á framfæri:

Virðing fyrir lögum og reglum er einn mikilvægasti þáttur í starfsemi Arion banka. Það er hagur bankans jafnt sem viðskiptavina hans að skýrar reglur séu fyrir hendi og að eftir þeim sé farið. Hlutverk eftirlitsaðila á fjármálamarkaði er mikilvægt og leggur bankinn ríka áherslu á að eiga gott samstarf við þá.

Arion banki er sannfærður um að farið hafi verið að lögum í umræddum viðskiptum. Ágallar voru hins vegar á framkvæmdinni þar sem ekki var farið eftir verklagsreglum bankans í hvívetna hvað varðar rekjanleika samskipta. Afleiðingarnar eru þær að bankinn getur ekki fært fullar sönnur á að rétt hafi verið staðið að málum.

Arion banki telur að í umræddum viðskiptum, þegar bankinn undir lok febrúar 2014 seldi um 1% í Högum, hafi verið farið að lögum þar sem allir aðilar viðskiptanna hafi búið yfir sömu upplýsingum. Upplýsingarnar sem um ræðir snúa að því að hluthafi sem var fjárhagslega tengdur fruminnherjum í Högum hafði, fyrir milligöngu markaðsviðskipta bankans, selt hlutabréf í félaginu. Afstaða bankans er að ekki geti verið um brot á innherjareglum að ræða þegar aðilar viðskipta hafa sömu upplýsingar og byggist sú afstaða á Evróputilskipuninni sem íslensku verðbréfaviðskiptalögin grundvallast á, lögskýringargögnum, lögfræðiálitum og dómafordæmum frá Evrópudómstólnum. Um þetta hefur ágreiningur bankans við Fjármálaeftirlitið snúist.

Fjármálaeftirlitið lítur svo á að bankinn hafi ekki fært óyggjandi sönnur á að allir aðilar viðskiptanna hafi búið yfir sömu upplýsingum. Á þeim forsendum ákveður eftirlitið að sekta Arion banka vegna brota á lögum um verðbréfaviðskipti.

Það er miður að framkvæmd viðskiptanna, sem áttu sér stað fyrir tæpum tveimur árum, hafi ekki verið eins og best verður á kosið hvað varðar rekjanleika samskipta. Þau fóru t.a.m. að mestu fram í gegnum óhljóðritaða síma. Í kjölfar viðskiptanna hefur verklag innan bankans verið skerpt þannig að alltaf verði unnt að færa sönnur á framkvæmd viðskipta. Arion banki hefur engu að síður þá staðföstu trú að aðilar þessara tilteknu viðskipta hafi verið jafnsettir og að lög um verðbréfaviðskipti hafi ekki verið brotin.

Ekki er fyrir hendi úrskurðarnefnd til að skjóta málinu til en bankinn mun meta lagalega stöðu sína í málinu.