Vextir á sjóðfélagalánum hækka í 3,95% frá 15. febrúar

Samkvæmt lánareglum EFÍA taka lánakjör til sjóðfélaga mið af meðalávöxtunarkröfu íbúðabréfa HFF34 að viðbættu 0,75% álagi og eru vextir endurskoðaðir 15. febrúar ár hvert. Vextir af sjóðfélagalánum geta lægst orðið 3,75% eins og verið hefur undanfarin ár. Ástæða fyrir þessu viðmiði er sú, að lögð er sú skylda á hendur stjórna lífeyrissjóða að ávaxta fé sjóðanna með hliðsjón af þeim kjörum sem best eru boðin á hverjum tíma með tilliti til ávöxtunar og áhættu. Sjóðfélagalán eru eins og hver annar fjárfestingakostur fyrir lífeyrissjóði en kjósi þeir að veita slík lán ber þeim að ákvarða vexti þeirra með hliðsjón af þeim kjörum sem best eru boðin á hverjum tíma fyrir sjóðina.

Nú hefur meðalávöxtunarkrafa íbúðabréfa HFF34 hækkað úr 2,50% árið 2013 í 3,20% árið 2014 og því munu vextir af sjóðfélagalánum hækka frá 15. febrúar nk. í 3,95%. Sjóðfélagalán eru verðtryggð með jöfnum greiðslum eða jöfnum afborgunum, að vali sjóðfélaga. Þau eru uppgreiðanleg hvenær sem er á lánstímanum án kostnaðar.