EFÍA leiðréttir sjóðfélagalán sem urðu fyrir neikvæðum áhrifum vegna rangrar vísitölu neysluverðs

Í mars urðu Hagstofunni á mistök við útreikning á neysluverðsvísitölunni sem leiðrétt voru nú í september. Hagstofan leiðrétti aðeins septembergildi vísitölunnar en ekki eldri gildi. Hefði þessi leiðrétting ekki komið til, hefði mánaðarbreyting vísitölunnar í september verið 0,21% í stað 0,48%. Mismunurinn er 0,27 prósentustig.

Almennt hafa þessi mistök Hagstofunnar hverfandi áhrif á þá sjóðfélaga EFÍA sem eru með sjóðfélagalán hjá sjóðnum og í raun hafa þau jákvæð áhrif á sjóðfélaga með eldri verðtryggð lán. Áhrifin eru hins vegar neikvæð á ný sjóðfélagalán sem voru tekin þegar vísitalan var ekki rétt. EFÍA mun því taka tillit til leiðréttingar Hagstofunnar um sl mánaðarmót og leiðrétta vísitölubundna höfuðstólshækkun þeirra sjóðfélagalána sem tekin voru þegar vísitalan var röng en tímabilið sem þar um ræðir er frá og með apríl mánuði til október mánaðar þessa árs. Stjórn EFÍA og framkvæmdastjóri telja það sanngirnismál að sjóðfélagar, sem tóku lán á þessu tímabili, beri ekki kostnað af þessum mistökum Hagstofunnar.

Leiðréttingin mun eiga sér stað í nóvember og verða þeir sjóðfélagar sem leiðréttingin nær til upplýstir sérstaklega um hana og áhrif hennar á lán þeirra.