Þriðja hæsta raunávöxtun Eftirlaunasjóðs FÍA í 25 ár

Árið 2019 var afar farsælt fyrir sjóðfélaga Eftirlaunasjóðs FÍA. Nafnávöxtun ársins nam um 13,2% sem samsvarar 10,2% raunávöxtun.¹  Meðaltal hreinnar raunávöxtunar síðustu fimm ára er 5,5%, 5,0% síðustu tíu ár og ef horft er til síðast liðinna 25 ára er meðalraunávöxtun sjóðsins nú 3,6% miðað við lok árs 20192.²  Í þessu samhengi er einnig ánægjulegt að horfa til þess að fyrir einungis fimm árum, eða árið 2015, skilaði EFÍA hæstu raunávöxtun íslenskra lífeyrissjóða og sinni eigin hæstu raunávöxtun frá árinu 1995, eða 14,0%.

Árið var viðburðarríkt á fjármálamörkuðum og áhugavert að stikla á stóru um þróun þeirra helstu markaða sem Eftirlaunasjóður FÍA fjárfestir á.

Erlend hlutabréf voru sá eignaflokkur sem skilaði mestri hækkun á árinu. Þrátt fyrir stormasamt ár í alþjóðastjórnmálum, óvissu á borð við viðskiptastríð Bandaríkjanna og Kína, svo og útgöngu Bretlands úr Evrópusambandinu hækkaði heimsvísitala hlutabréfa um 25,2% mælt í Bandaríkjadal, eða alls 30,2% í íslenskum krónum vegna veikingar krónunnar á móti helstu viðskiptamyntum. Frá afnámi fjármagnshafta hefur sjóðurinn aukið allverulega við erlendar eignir sínar og var hlutfall þeirra 30,4% af heildarverðmæti EFÍA í lok árs 2019.

Innlendur hlutabréfamarkaður skilaði á heildina litið góðri ávöxtun á árinu 2019 og hækkaði Úrvalsvísitala hlutabréfa um 31,4%. Hækkunina má þó að miklu leyti skýra með gengisþróun Marel sem vigtar nú um helming að hlutfalli í vísitölunni.

Innlendur skuldabréfamarkaður skilaði mjög góðri ávöxtun á árinu sem rekja má til lækkandi raunvaxtastigs og minnkun verðbólguálags. Óverðtryggð ríkisskuldabréf gerðu heilt yfir betur en verðtryggð, að mestu vegna lækkunar á verðbólguálagi, þar af gáfu lengstu skuldabréfin almennt bestu ávöxtunina. Ávöxtun óverðtryggðra ríkisskuldabréfa var 5,3% til 23,0% og ávöxtun verðtryggðra 3,7% til 8,9%.

Það er því er óhætt að segja að árið 2019 hafi á heildina litið verið einkar gæfusamt á fjármálamörkuðum fyrir Eftirlaunasjóð FÍA. Markmið stjórnar er að hámarka ávöxtun sjóðsins að teknu tilliti til áhættu og tryggja þannig sjóðfélögum, mökum þeirra og börnum lífeyri í samræmi við samþykktir sjóðsins.

¹ Vakin er athygli á því að ávöxtunartölur fyrir árið 2019 miða við óendurskoðað uppgjör.
² Ávöxtunartölur hafa ekki verið endurreiknaðar v. áranna 1995 -2011 með ttt. mismunar á markaðsvirði verðbréfa og virði þeirra m.v. kaupkröfu en sjóðurinn breytti uppgjörsaðferð sinni í samræmi við breytingar á reglum ársreikninga árið 2016.