Ávöxtun EFÍA 2022

Árið sem var að líða markar eitt mest krefjandi ár á fjármálamörkuðum frá fyrri hluta síðustu aldar. Heimsfaraldur, stríðsástand, þrálát verðbólga og hækkandi vextir voru helstu áskoranir síðasta árs. Nær allir markaðir í heiminum lækkuðu umtalsvert á árinu en hlutabréf lækkuðu að jafnaði meira en skuldabréf. Slíkar markaðsaðstæður undirstrika mikilvægi þess að vera með dreift eignasafn til þess að standast sveiflur á mörkuðum. EFÍA leggur upp úr því að fjárfesta í ólíkum eignaflokkum, atvinnugreinum og landsvæðum til þess að dreifa áhættu sem mest.

Þróun markaða

Á síðasta ári voru hlutabréf sá eignaflokkur sem lækkaði hvað mest. Úrvalsvísitala Kauphallar Íslands (OMXI10) lækkaði um 26,5% en heimsvísitala hlutabréfa (e. MSCI World Index) lækkaði um 19,5% í bandaríkjadal eða um 12,0% í íslenskum krónum á árinu. Horft fram á við, geta tækifæri myndast á hlutabréfamarkaði eftir miklar lækkanir líkt og sáust á síðasta ári en þá býðst fjárfestum að kaupa hlutabréf á hagstæðari verðkennitölum.

Nafnávöxtun verðtryggðra ríkisskuldabréfa var á bilinu -8,4% til 5,0% á tímabilinu en óverðtryggðra töluvert lakari eða -17,0% til 2,0%. Yfirlýsing fjármálaráðherra í október sl. í tengslum við uppgjör og slit ÍL-sjóðs hafði töluverð áhrif til lækkunar á ávöxtun skuldabréfasafnsins. Nánari umfjöllun um mál ÍL-sjóðs má finna hér.

Hækkun stýrivaxta á árinu og aðrir óvissuþættir í efnahagsmálum leiddu til þess að ávöxtunarkrafa skuldabréfa hækkaði og þar með lækkaði virði þeirra en á móti vó þrálát verðbólga. Horfur á skuldabréfamörkuðum til lengri tíma eru hins vegar góðar. Fjárfestum býðst nú að kaupa skuldabréf á mun hærri ávöxtunarkröfu en stóð til boða í lágvaxtaumhverfi síðustu ára.

Ávöxtun 2022

Ávöxtun síðustu ára hefur verið afar góð en árið 2021 var með þeim bestu frá upphafi sjóðsins. Í takt við gang markaða á liðnu ári var ávöxtun á eignasafni EFÍA árið 2022 þó neikvæð. Nafnávöxtun* eignasafnsins var neikvæð um 6,1% að markaðsvirði en það samsvarar um 14,1% neikvæðri raunávöxtun. Hlutabréf voru sá eignaflokkur sem má einna helst rekja neikvæðu ávöxtunina til, bæði erlend og innlend.

Þegar horft er á lengri tíma sparnað eins og lífeyrissparnað er mikilvægt að minna sig á að ávöxtun til lengri tíma er það sem mestu máli skiptir og ekki er óeðlilegt að það verði nokkrar sveiflur á milli ára. Langtímaávöxtun sjóðsins hefur verið góð en á myndinni hér fyrir neðan má sjá meðalávöxtun Eftirlaunasjóðs FÍA til 3, 5 og 10 ára m.v. 31.12.2022 ásamt ávöxtun sjóðsins frá áramótum. Nafnávöxtun EFÍA til 10 ára á ársgrundvelli hefur t.a.m. verið 7,8% og raunávöxtun 4,2%. Aðalatriðið er að meðalávöxtun sjóðsins til lengri tíma er mikilvægari en sveiflur í ávöxtun til skamms tíma.

* Óendurskoðuð