Ávöxtun á liðnu ári og áherslur fjárfestingarstefnu EFÍA 2025

Árið 2024 var allt í senn viðburðaríkt og krefjandi. Það einkenndist af háu vaxtastigi og lækkandi verðbólgu. Þrátt fyrir mikla óvissu vegna ríkisfjármála, eldsumbrota, kjarasamninga og kosninga endaði árið nokkuð vel á verðbréfamörkuðum. Vaxtalækkunarferli Seðlabankans hófst í október og lækkun verðbólgu gefur vonir um eðlilegra vaxtastig á næstu misserum. Slík þróun hefur ótvírætt jákvæð áhrif á verðbréfamarkaðinn. Á skuldabréfamarkaði urðu því betri skilyrði fyrir fjárfesta og varð töluverð aukning í fjárfestingum erlendra aðila í lengri óverðtryggðum skuldabréfum. Eftir erfiðan fyrri hluta ársins á innlenda hlutabréfamarkaðnum varð viðsnúningur drifinn áfram af væntingum um frekari vaxtalækkanir.

Stýrivextir standa nú í 8,5% eftir að hafa lækkað um 0,75 prósentustig og verðbólgan lækkaði frá 6,7% í 4,8% á árinu 2024. Nafnávöxtun verðtryggðra ríkisskuldabréfa var á bilinu 7,4% til 8,5% á árinu en óverðtryggðra 5,5% til 8,9%. Verðþróun og ávöxtun skuldabréfa var þó nokkuð stöðug á árinu, þrátt fyrir lækkun stýrivaxta.

Úrvalsvísitala Kauphallar Íslands (OMXI15CAP) hækkaði um 15,9% á árinu 2024. Framan af ári var innlendi hlutabréfamarkaðurinn heldur krefjandi en það dró til tíðinda þegar vaxtalækkunarferli SÍ hófst og félög fóru að skila inn sterkum uppgjörum á þriðja ársfjórðungi. Gengi flestra félaga tók þá að hækka drifið áfram af væntingum um frekari vaxtalækkanir og sameining JBT og Marels jók flæði sem hafði jákvæð áhrif á markaðinn. Erlendir hlutabréfamarkaðir hafa sýnt afar jákvæða þróun og ávöxtun hefur reynst mjög góð þrátt fyrir áskoranir á borð við efnahagslega óvissu, stríðsátök og forsetakosningar. Heimsvísitala hlutabréfa (MWXO) hækkaði um 17% í bandaríkjadal á árinu 2024 en jókst enn frekar, um 19,7%, í íslenskum krónum. Ávöxtun hefur, líkt og áður, verið drifin áfram af fáum tæknifyrirtækjum en væntingar um vöxt, þróun og nýtingu gervigreindar hafa verið lykilþættir í þessari þróun. Jafnframt hefur eftirspurn eftir ákveðnum vörum og þjónustu haldist sterk, sem hefur stutt við hlutabréfaverð alþjóðlegra fyrirtækja.

Markaðsaðstæður síðustu ára undirstrika mikilvægi þess að vera með dreift eignasafn til þess að standast sveiflur á mörkuðum. EFÍA leggur upp úr því að fjárfesta í ólíkum eignaflokkum, atvinnugreinum og landsvæðum til þess að dreifa áhættu sem mest.

Ávöxtun 2024

Nafnávöxtun* eignasafnsins var jákvæð um 11,6% að markaðsvirði og raunávöxtun 6,5%.

Þegar horft er á lengri tíma sparnað eins og lífeyrissparnað er mikilvægt að minna sig á að ávöxtun til lengri tíma er það sem mestu máli skiptir og ekki er óeðlilegt að það verði nokkrar sveiflur á milli ára. Langtímaávöxtun sjóðsins er arðbær en á myndinni hér fyrir neðan má sjá meðalávöxtun Eftirlaunasjóðs FÍA til 3, 5 og 10 ára m.v. 31.12.2024 ásamt ávöxtun sjóðsins frá áramótum. Nafnávöxtun EFÍA til 10 ára á ársgrundvelli hefur t.a.m. verið 8,0% og raunávöxtun 3,6%.

*Óendurskoðuð

Fjárfestingarstefna 2025

Stjórn Eftirlaunasjóðs FÍA endurskoðar fjárfestingarstefnu sjóðsins að minnsta kosti árlega og í nóvember sl. undirritaði hún nýja fjárfestingarstefnu fyrir árið 2025. Síðustu ár hefur verið lögð áhersla á að auka vægi og áhættudreifingu erlendra eigna. Í nýrri stefnu er þeirri vegferð haldið áfram en helstu breytingar eru þær að vægi erlendra hlutabréfa er aukið en á móti er dregið úr vægi innlendra og erlendra skuldabréfa.

Breytingar á stefnunni í ár eru gerðar til þess að halda áfram á vegferð síðustu ára um að auka erlenda tengingu og jafnframt áhættudreifingu erlendra eigna. Þannig er verið að stuðla að hærri langtímaávöxtun. Fjárfestingarstefna sjóðsins er birt á vefsíðu sjóðsins en hana má nálgast hér.

Markmið um hlutfall eignaflokka í sjóðnum breytast eins og hér segir:

• Innlend skuldabréf lækki úr 43% í 41%
• Innlend hlutabréf óbreytt í 12%
• Innlendar sérhæfðar fjárfestingar óbreytt í 5%
• Erlend hlutabréf hækki úr 25% í 28%
• Erlend skuldabréf lækki úr 5% í 4%
• Erlendar sérhæfðar fjárfestingar óbreytt í 10%

*Ný flokkun fyrir árið 2024 – var áður skilgreint sem innlend hlutabréf.