Hagnaður
30,6
milljarðar króna
Arion banki hefur gefið út árs- og sjálfbærniskýrslu og áhættuskýrslu fyrir árið 2025. Ársreikningur bankans fyrir árið 2025 var birtur 11. febrúar.
Árs- og sjálfbærniskýrsla Arion banka inniheldur yfirlit yfir árangur Arion samstæðunnar á árinu 2025, helstu þætti starfseminnar, fjárhagsniðurstöður og sjálfbærni.
Paul Richard Horner og Benedikt Gíslason
„Leiðandi fyrirtæki þurfi að vera framsýn og tilbúin að breytast“
Árið 2025 var Arion samstæðunni hagfellt. Starfsemin gekk vel þrátt fyrir að borið hafi á óróa í ytra umhverfi. Góður vöxtur var á nær öllum sviðum og voru ýmsar nýjungar kynntar á árinu en hæst bar nýtt fríðindakerfi fyrir einstaklinga – Arion fríðindi. Um er að ræða mikilvægan áfanga í að tryggja að viðskiptavinir Arion samstæðunnar njóti góðs af fjölbreyttu þjónustuframboði.
Í Árs- og sjálfbærniskýrslu Arion banka 2025 er rætt við Benedikt Gíslason bankastjóra og Paul Richard Horner stjórnarformann sem fara yfir helstu verkefni ársins og skyggnast inn í næstu verkefni samstæðunnar.
Gott ár að baki
Arion samstæðan starfar samkvæmt skýrum fjárhagsmarkmiðum sem birt eru opinberlega. Rekstur Arion gekk almennt vel á árinu 2025 og náði bankinn markmiði sínu um arðsemi eiginfjár umfram 13%. Að auki starfar bankinn, svið hans, dótturfélög og starfsfólk samstæðunnar eftir fjölþættum markmiðum. Fjölmörg þeirra eru mikilvægur liður í kaupaukakerfum félaganna og er þróun þeirra sýnileg starfsfólki allt árið.
Eignir í stýringu og þjónustu samstæðunnar
1.989
milljarðar króna
Rekstrartekjur
78,4
milljarðar króna
Sjálfbærar lánveitingar
12,9%
af heildarlánveitingum bankans
Tekjur Varðar af vá-tryggingasamningum
20,8
milljarðar króna
Niðurstaða jafnlaunagreiningar
0,4%
óútskýrður launamunur kynjanna
Lán til viðskiptavina
1.329
milljarðar króna
Arðsemi eiginfjár
14,9%
Stöðugildi
901
Eignir í stýringu Stefnis
379
milljarðar króna
Víðtæk upplýsingagjöf á sviði sjálfbærni
Árs- og sjálfbærniskýrsla Arion banka fyrir árið 2025 inniheldur m.a. umfjöllun um mannauðsmál, umhverfis- og loftslagsmál, fjármagnaðan útblástur, sjálfbær fjármál og umfangsmikið sjálfbærniuppgjör í samræmi við GRI Standards og UFS leiðbeiningar Nasdaq. Arion banki hefur hafið innleiðingu á ESRS-staðlinum, European Sustainability Reporting Standards, og nær skýrslugjöf í samræmi við staðalinn til allrar samstæðunnar.
Sjálfbærnilöggjöf í tengslum við flokkunarkerfi Evrópusambandsins (EU Taxonomy) tók gildi hér á landi árið 2023. Upplýsingar í samræmi við flokkunarreglugerðina eru birtar í viðauka við ársreikning samstæðunnar.
Áhættuskýrsla
Áhættuskýrsla bankans fjallar um helstu áhættuþætti Arion banka á ítarlegan hátt og er þar að finna greinargóðar upplýsingar um áhættu- og eiginfjárstýringu bankans. Auk þess er að finna upplýsingar um stjórnskipulag bankans með tilliti til áhættu sem og starfskjarastefnu. Skýrslan er gefin út ásamt upplýsingasniðmátum Evrópsku bankaeftirlitsstofnunarinnar (EBA) og ætti að lesast samhliða þeim.