Í stað þess að upphæð greiðslu sé tekin strax af reikningnum þínum fer færslan í bið. Upphæðin sem verður til ráðstöfunar lækkar en staða reiknings er óbreytt þar til posinn er gerður upp.

Ástæða þessarar breytingar er að Reiknistofa bankanna er að uppfæra grunnkerfi sín og hættir samhliða að sinna hefðbundinni debetkortavinnslu sem mun færast til Valitor. Með því skapast tækifæri til að birta færslur í bið en slíkt var ekki mögulegt í kerfi RB.

Breytingin mun taka gildi í Arion appinu og netbankanum að morgni 11. október 2022 en þá mun sýnin breytast hjá þeim sem eru með debetkort útgefið í Smáraútibúi. Að morgni 25. október breytist sýnin hjá fleiri korthöfum og síðan daglega þar til allir debetkorthafar hafa fengið nýja sýn, þar með fyrirtækjakorthafar.

Ekki er búist við að korthafar verði fyrir neinum truflunum þegar þeir greiða með kortinu á meðan breytingin er gerð en ef það verður raunin mun hún aðeins standa yfir í nokkrar mínútur.

Hjá Endurvinnslunni mun ekki verða hægt að fá greitt inn á ný eða endurnýjuð debetkort sem eru stofnuð eftir 19. október 2022 í einhvern tíma þar til Endurvinnslan hefur uppfært sín kerfi.

Fyrirtæki gætu þurft að taka tillit til þessara biðfærslna við bókun debetkortafærslna vegna úttekta starfsmanna á fyrirtækja debetkortum. Þá sérstaklega ef vaninn er að bóka debetkortafærslur sem staðgreiðslu innan sama dags og færslan á sér stað. Netbanki Arion og B2B vefþjónusta birtir bæði kaup- og bókunardagsetningu færslunnar.